КОЦУР – Всоботу, 16. юлия, у Коцуре отримана централна програма тогорочного Фестивалу фолклору Руснацох „Коцурска жатва”, а пре диждж, танєчна часц Фестивалу отримана у Велькей сали Дому култури, а нє на лєтнєй бини, як то було плановане.
У першей часци наступели домашнї дзецински танєчни ґрупи КУД „Жатва”, у хторей були и дзеци з вербаского КПД „Карпати”, и КУД „Завичајно врело”, а потим, после интонованя гимни Сербиї и шветочней шпиванки Руснацох у Сербиї, Фестивал и службено отворени з придаваньом хлєба з тогорочного жита предсидательови Општини Вербас Миланови Ґлушцови и предсидательови Националного совиту Руснацох Славкови Рацови, котри и привитали Фестивал.
У Фестивалскей часци наступели танєчни ансамбли КУД „Тарас Шевченко” з Дюрдьова”, Руского културного центру (РКЦ) з Нового Саду, КУД „Петро Кузмяк” з Нового Орахова и домашнього КУД „Жатва” з Коцура.
Медзи Фестивалску и Ревиялну часцу програми наступели госци зоз Словацкей – Фолклорни ансамбл „Кечера” з Якубянох, а у Ревиялней часци танєчнїки КПД „Дюра Киш” зоз Шиду, КУД „Тарас Шевченко” з Дюрдьова, РКЦ з Нового Саду, КУД „Жатва” и КУД „Завичајно врело” з Коцура, та Дому култури з Руского Керестура. През програму госцох водзели Емилия Чизмар и Стеван Самочета.
Попри спомнутих Ґлушца и Раца, програму провадзели и народна посланїца Олена Папуґа, заменїк предсидателя НС Йовґен Мудри и члени Националного совиту Руснацох, директор Заводу за културу войводянских Руснацох Серґей Тамаш, помоцнїк предсидателя Општини Вербас Ксения Бенце и члени Општинскей ради Вербас, предсидатель Совиту Месней заєднїци Коцур Желько Бєлан, та представителє наших установох, институцийох и здруженьох.
По законченю програми друженє предлужене на Торба-балу, хтори отримани у просторийох и дворе Добродзечного огньогасного дружтва Коцур, а госцох забавял тамбурови оркестер „Коцурски бетяре”.
Отримованє Фестивалу финансийно потримали Општина Вербас, Национални совит Руснацох, Покраїнски секретарият за Културу и явне информованє, Покраїнски секретарият за образованє, управу, предписаня и национални меншини-национални заєднїци и коцурски привреднїки.