Пастор розписал виберанки за Скупштину Войводини

автор зам
1.2k Опатрене

НОВИ САД – Предсидатель Скупштини АП Войводини Иштван Пастор вчера розписал порядни виберанки за Скупштину Войводини за 24. април, так же виберанки за шицки три уровнї власци – републични, покраїнски и локални буду отримани исти дзень.

Виберанки за войводянски парламент после скоро 30 роки буду отримани лєм по пропорцийней системи, а нє и по векшинскей, односно комбинованей системи, так як ше вибера посланїкох до републичного, односно одборнїкох до локалних скупштинох.
До тераз, половка зоз 120 посланїкох до Скупштини Войводини виберана по векшинскей, а половка по пропорцийней системи.

1-APV-02

Пастор поволал гражданох же би вихасновали свойо виберанкове право, же би гласали на наступних виберанкох „за того кого жадаю” и гласачом поручел:

– Ви єдини котри маце право одлучовац о тим же хто вас у шлїдуюцим мандату будзе представяц у Скупштини Войводини – гварел Иштван Пастор на конференциї за медиї и додал же Скупштина АП Войводини парламент у хторим ше пестує високи уровень култури, прецо поволал партиї на културну виберанковуи кампаню, на борбу з арґументами и програмами.

Покраїнска виберанкова комисия одлучела же виберацки лїсток за покраїнски виберанки будзе блядо-желєни.

Остатнї виберанки за Скупштину Войводини отримани 6. мая 2012. року, а од 2000. року у Покраїни на власц коалиция Демократскей странки, Лиґи социялдемократох Войводини и Союзу войводянских Мадярох.

ПОВЯЗАНИ ТЕКСТИ