РУСКИ КЕРЕСТУР – Найдлугша розправа на всоботу отриманей схадзки Националного совиту (НС) Руснацох у Руским Керестуре була о дальшим розполаганю з квартельом НС у Новим Садзе и на концу заключене же ше го оглаши за видаванє студентом (предносц буду мац Руснаци) у таким стану яки є, алє ше источашнє предлужи и його предаванє.
Од прешобутней идеї же би ше за пенєж з предаваня квартелю купело будинок старей Ґимназиї у Руским Керестуре за шедзиско НС и други змисти ше одустало, понеже терашнї власнїк „АБЦ фуд” за будинок пита аж 65 000 еври. Нє найдзени анї други одвитуюци простор, так же ше будзе робиц на витворйованю скорейшей идеї же би ше школски будинок Замок (дзе и тераз канцелария НС, хаснує го и Школа „Петро Кузмяк”) од компетентних питало на длугорочни закуп, на 99 роки. Попри НС, у нїм би були и други змисти, як цо то музейна збирка, ґалерия, архива, библиотека…
Чи и видавац и предавац, лєбо лєм предавац квартель у Новим Садзе була найвекша дилема членох Совиту, алє шицки потримали предкладанє же би ше з предаваня обезпечело простор за, як є наволани – Руски дом у Коцуре, хтори би хасновали шицки Руснаци у Коцуре, шицки КУД и здруженя Руснацох у тим месце, ту би була Подручна канцелария НС, Дописовательство „Руского слова”…
Пракса указала же таки будинок Коцурцом потребни, нє прето же су нєзадовольни з хаснованьом просторийох у Доме култури и нє напущели би го, бо там финализую свойо програми, алє як дополнююци простор за пририхтованє програмох, отримованє схадзкох и други порядни активносц, гварели члени НС з Коцура Микола Шанта и Микола Ґубаш. Надпомли и же простор у Доме култури хасную шицки постояци здруженя з обласци култури у Коцуре.
Шанта и Ґубаш винєсли же у Коцуре найдзени одвитуюци и функционални простор – добре очувана хижа, велькосци 252 квадратни метери закритого и ище прейґ коло 1 300 квадратни метери одкритого простору, а цена вигодна. Заключене же активисти з Коцура до НС пошлю инициятиву за купованє того простору, з потребним предрахунком за його реновиранє за другу намену, а надпомнуте же єдно зоз заключеньох Одбору за културу НС же треба обезпечиц простор за роботу наших КУД у Коцуре.
Вязано за квартельно-маєтни питаня, предсидатель НС Славко Рац членох Совиту поинформовал же би того мешаца мали буц премосцени дотерашнї гамованя за купованє квартелю у Йована Суботича 8, та годно предлужиц активносци на доходзеню до планованого будинку за Дом школярох и други нашо змисти у Новим Садзе.