НОВИ САД – У Руским културнимо центре у Новим Садзе вчера вечар, 7. октобра, отримани интересантни мултимедиялни перформанс, у режиї Звонимира Павловича, а з нагоди отвераня новей, ювилейней 20. театралней сезони Драмского студия РКЦ, и у рамикох преслави 70-рочнїци снованя Дружтва.
Перформанс ше одвивал у штирох сеґментох/просторох, котри були повязани, як физично так и идейно, а кажди уметнїк обдумал свой простор. Наступели познати новосадски уметнїки котри уж роки доприноша визуализациї новосадских фестивалох и драмских витвореньох – академска малярка Боґданка Сопка зоз своїма инсталациями, дизайнер, видео-арт уметнїк и фотоґраф Ненада Илич викладал свойо роботи, а „Pap Music Quartet” премиєрно виведол свойо найновши музични обробки.
О „Месце и судьба алтернативи у нєшкайшей урбаней (р)ускей култури” хтора, и попри тим же запровадзує европски стандарди, занєдзбана и положена на марґини каждодньовосци, бешедовали новинарка Александра Живкович Бучко и єй госц Мирослав Кевежди, филозоф.
Ексклузивно за тоту нагоду була и видео-проєкция єдней з култних представох дакедишнєй новосадскей сцени тедишнього РНТ „Дядя” – „Скравец” з конца 90-рокох прешлого вику, у режиї Звонимира Павловича.