МИКЛОШЕВЦИ – У грекокатолїцкей церкви Рождества Пречистей Дїви Мариї у Миклошевцох вчера на дополадньовей Служби Божей преславена Свята Евхаристия, хтору першираз прияли Александра Николич, Ксения Пап, Лана Антоляк, Матей Мудри, Марино Бабинчак и Кристиян Мудри.
Службу Божу служел парох миклошевски и викар сримско-славонски о. Яким Симунович, котри пияток вечар висповедал першопрачашнїкох. Дзеци за тоту подїю пририхтовани на школских годзинох виронауки при вироучительки Лесї Пап, як и у церкви при о. Симуновичови.
Парох родичом и дзецом подзековал и повинчовал же до своїх шерцох прияли Исуса, зоз жаданьом же би постали чесни парохиянє.
По Служби була евхаристийска процесия зоз Святима Тайнами, а дзивчата опрез процесиї руцали квеце. После заєднїцкого фотоґрафованя, першопричашнїки достали и спомини, як памятку на тоту важну духовну подїю у їх живоце.
