НОВИ САД – Штварта порядна схадзка Управного одбору Заводу за културу войводянских Руснацох, отримана вчера 9. фебруара, у заєднїцких просторийох Завода и Новинско-видавательней установи „Руске слово”.
Дньови шор за тоту схадзку бул обсяжни, а на першей схадзки Одбору у новим року, члени спатрали предклад плану роботи и финансийни план за тот рок, як и звит о дїлованю и финансийни звит за прешли рок.
Вкупни прилїв средствох до буджету Завода у прешлим року бул 26.774.767 динари. Зоз буджету АП Войводини, як и потераз, уплацене 6,6 милиони динари у штирох траншох. Зоз 2020. року пренєшени 554.960 динари зоз порядних средствох и 300.000 динари зоз проєктох. Средства достати од донацийох виношели 19.319.806 динари, од чого найвекши проєкт капиталне укладанє до адаптациї обєкту у ул. Матици сербскей 15, а остаток средствох достати за 2 проєкти зоз Министерства култури и два зоз Городу Нового Саду. У прешлим року Завод рационално и у складзе зоз предписанями хасновал одобрени средства.
Кед слово о реализованих програмних активносцох Заводу, мож повесц же бул обсяжни. Видруковани „Зборнїк наукових роботох зоз 5. рускей Науковей конфенренциї за студентох, младих науковцох и фаховцох“ вєдно зоз НВУ „Руске слово“.
Потим предлужена робота на диґитализациї културного скарбу Руснацох на просторох Войводини и Сербиї. Завод у тим року диґитализовал 8.599 боки матрикулох зоз грекокатолїцких церковних општинох Нови Сад, Руски Керестур, Коцур, Стари Вербас Шид, Дюрдьов. Диґитализовани „Руски календар” од 1921. по 1946. рок, 13 числа часопису „Творчосц” и седем числа „Студиї Рутеники”. Попри тим, Завод финансийно потримал друкованє кнїжки о културним и духовним живоце Руснацох зоз акцентом на специфичносцох Руснацох у Сриме авторох о. Владимира Еделинского и Павла Малацка, як и друкованє осучаснєного Правопису зоз правописним словнїком проф. Михайла Фейси и Гелени Медєши.
У рамикох презентациї нашей култури, Завод пенєжно потримал орґанизацию Централней преслави Националного швета, як и Фестивалу „Ружова заградка”. Реализована и онлайн роботня за дзеци на тему Велькей ноци, хтора титлована и по сербски, а потим емитована и на нашей телевизиї. Тиж так, вєдно зоз НВУ „Руске слово“ видрукована сликовнїца за дзеци зоз налїпками „Карусел“.
Як и кажди рок, Завод и прешлого року зоз трецину свойого програмского буджету потримал проєкти наших КУД-ох и других орґанизацийох прейґ явного конкурсу.
Було предвидзене же члени Одбору буду бешедовац и о вименкох Статуту Заводу котри тераз нє ускладзе зоз найновшима законскима предписанями. Медзитим, з оглядом же зоз покраїнских службох нє сцигол одвит на предклад националних совитох у вязи зоз вименку Одлуки о снованю пейцох меншинских заводох, тота точка знята зоз дньового шору.
На схадзки члени Одбору принєсли и одлуки о Плану явних набавкох и набавкох на хтори ше закон нє применює за тот рок, як и одлуки хтори ше одноша на вибор директора за Завод, понеже по новим Закону о култури УО муши мац согласносц АПВ за розписованє конкурсу.
Завод успишно по конєц прешлого року реализовал явни набавки хтори ше одноша на адаптацию и реконструкцию обєкту у ул. Матици сербскей 15 у Новим Садзе и други процедури вязани за пририхтованє того простору за шедзиско Заводу.