ДЮРДЬОВ – Хлопска шпивацка ґрупа Руского културного центру з Нового Саду побиднїк тогорочного 13. Фестивалу жридлового шпиваня „Най ше нє забудзе” у Дюрдьове, а специялну награду достала Мишана ґрупа Дружтво Руснацох зоз Суботици. Награди им уручела предсидателька фахового жирия Агнетка Тимко, а попри нєй, шпивацки ґрупи оценьовали Татяна Колєсар Ґвоїч, Златица Няради, Оленка Сеґеди и Владимир Тимко.
Фестивал жридлового шпиваня „Най ше нє забудзе” отримани вчера, 23. авґуста у дюрдьовским Доме култури, а у трогодзиновей програми наступели двацец шпивацки ґрупи – седемнац у змагательней конкуренциї, а три у ревиялней часци.
По традициї, Фестивал отворели прешлорочни побиднїк – Дзивоцка шпивацка ґрупа КУД „Тарас Шевченко” з Дюрдьова, а потим наступели Мишана ґрупа КПД „Карпати” з Вербасу, Хлопска ґрупа домашнього КУД „Тарас Шевченко”, Женска ґрупа КУД „Петро Кузмяк” з Нового Орахова, Младша и Старша мишана ґрупа КПД „Дюра Киш” зоз Шиду, Мишана ґрупа Културного дружтва Руснацох з Винковцох, з Горватскей, Женска и Хлопска ґрупа Руского КУД „Др Гавриїл Костельник” з Кули, Хлопска ґрупа КУД „Яким Гарди” з Петровцох, з Горватскей, Мишана ґрупа КУД „Иван Котляревски” з Бикичу, Женска ґрупа КУД „Жатва” з Коцура, Хлопска и Дзвоцка ґрупа Дому култури Руски Керестур и Женска ґрупа КУД „Яким Ґовля” з Миклошевцох, з Горватскей.
У ревиялней часци Фестивалу участвовали Женска жридлова ґрупа КУД „Тарас Шевченко”, Женска шпивцка ґрупа „Дюрдєвак”, обидва з Дюрдьова, и Дзивоцка шпивацка ґрупа новосадского Руского културного центру.
На отвераню Фестивалу присутних привитал предсидатель Националного совиту (НС) Руснацох Славко Рац, а Фестивал урядово отворел подпредсидатель Покраїнскей влади и покраїнски секретар за привреду, обезпечованє роботи и равноправносц полох Мирослав Васин.
Медзи визначнима госцами на Фестивале привитани и народна посланїца и членїца НС Руснацох Олена Папуґа, директорка НВУ „Руске Слово” Мартица Тамаш, директор Заводу за културу войводянских Руснацох Серґей Тамаш, членїца НС и директорка керестурскей Школи „Петро Кузмяк” Хелена Пашо Павлович, директорка ОШ у Дюрдьове Мария Тртич, предсидателька Совиту Месней заєднїци Дюрдьов Леона Виславски, дюрдьовски парох о. Йоаким Холошняй и о. Борис Холошняй зоз Швайцарскей, а програму провадзели и дзепоєдни други члени НС Руснацох и представитлелє наших КУД.
Фестивал у Келандаре репрезентативних манифестацийох Националного совиту Руснацох, а снователь и главни орґанизатор Фестивалу КУД „Тарас Шевченко” з Дюрдьова, односно Орґанизацийни одбор Фестивалу.
Фестивал у Дюрдьове финансийно потримали Покраїнски секретарият за кулуру и явне информованє, Покраїнски секретарият за образованє, управу, предписаня и национални меншини-заєднїци, Национални совит Руснацох, Завод за културу войводянских Руснацох и Општина Жабель.
Вецей фотоґрафиї у окремней ґалериї на правим боку нашого сайту.