КЕЧКЕМЕТ (МАДЯРСКА)/РУСКИ КЕРЕСТУР – У грекокатолїцкей парохиї Воздвижениє чесного хресту у Кечкемету, у Мадярскей, всоботу, 10. децембра докончене подписованє побратименя тей парохиї з парохию св. оца Миколая з Руского Керестура. Тоти два парохиї, вєдно з парохию св. Розалиї зоз Сеґедину, пририхтую и заєднїцки прейґгранїчни проєкт.
Спорозуменє о побратименю двох парохийох потримали и представителє власцох, так же го у мено локалней самоуправи Кечкемету и Општини Кула подписали Мак Корнел и заменїк предсидателя Општини Кула Кароль Валка.
Спорозуменє зоз своїм благословом подписали и владикове – домашнї митрополит Филип Кочиш и наш еґзарх, владика Георгий Джуджар.
У мено парохийох спорозуменє подписане дакус скорей у руским Керестуре, под час нєдавней нащиви делеґациї кечкеметскей парохиї Керестуру з нагоди означованя 10-рочнїци парохийного Каритасу, а подписали го парохове – кечкеметски о. Ласло Фечак и керестурски о. Михайло Малацко.
Тото побратименє основа прейґранїчного сотруднїцтва мадярских грекокатолїцких парохийох з Кечкемету и Сеґедину (хтора з керестурску прахию влонї витворела проєкт медзисобних паломнїцких нащивох) з нашу парохию у Руским Керестуре.
Спомнути три парохиї уж єден час пририхтую заєднїцки проєкт, з хторим по 30. януар идуцого року маю конкуровац до европских ИПА фондох, а у рамикох хторого керестурска парохия планує вибудов Центру за стретнуца у Марийовим святилищу Водици.
Под час терашнєй нащиви преширеней делеґациї керестурскей парохиї Кечкемету, у хторей були и керестурски парох о. Михайло Малацко и представителє парохийного Каритасу, отримани и фахови сход о тим проєкту.