НОВИ САД – Покраїнска виберанкова комисия (ПВК) вчера, 4. мая, утвердзела и на своїм официйним сайту обявела конєчни резултати виберанкох за посланїкох до Скупштини Войводини, отриманих 24. априла.
По конєчних резултатох з ПВК, виберанкова лїстина колациї на чолє зоз Сербску напредну странку (СНС) „Александар Вучич-Сербия победзує”, освоєла 44,48 одсто гласох, лєбо 63 зоз 120 мандатох у Скупштини Войводини.
Коалиция коло Социялистичней партиї Сербиї освоєла 8,86 гласох и 12 мандати, а по дзешец посланїкох у будуцим покраїнским парламенту буду мац Сербска радикална Странка (СРС), хтора освоєла 7,66 одсто гласох и коалиция на чиїм чолє Демократска странка (ДС), зоз 7,24 одсто освоєних гласох.
Дзевец мандати у Скупштини АП Войводини буду мац Лиґа социялдемократох Войводини (ЛСВ), хтора освоєла 6,43 одсто гласох, а лїстина „Досц було-Саша Радулович” будзе мац седем мандати на основи 5,54 одсто достатих гласох гласачох котри вишли на виберанки.
Союз войводянских мадярох (СВМ) освоєл 4,88 одсто гласох и будзе мац шейсц мандати у покраїнскей скупштини, а два мандати будзе мац лїстина „Мадярски рух за автономию”, хтора освоєла 1,71 одсто гласох. Єден мандат припаднул Желєней странки, за хтору гласали 1,14 одсто вибераче.
Други ище шейсц лїстини хтори участвовали на покраїнских виберанкох нє освоєли достаточне число гласох за преходзенє цензусу.
По обявйованю конєчних резултатох виберанкох, актуални предсидатель Скупштини Войводини Иштван Пастор ма три днї за обявйованє датума отримованя конститутивней схадзки, а на основи його вияви за РТВ, мож обчековац же то будзе релативно пошвидко.