НОВИ САД – Вчера, 21. юния, у Новим Садзе почал Дзевяти „Тамбурка фест 2016” – шветови тамбурашски фестивал, а тирва по 25 юний. Фестивал будзе отримани и на Петроварадинскей твердинї, у змагательней часци участвую 10 оркестри, док 20 тамбурашски оркестри и гвизди естради буду у ревиялней часци Фестивалу.
Фестивал почал праве на Шветови дзень музики, а у „фестивалскей увертири” у центре городу вчера и нєшка Новосадянох анимую аж 15 тамбурашски оркестри з рижних местох.
На ютре, 23. юния, програми фестивалу буду на Площи шлєбоди. Перше коло 17 г. по новосадских булеварох и улїцох руша „Тамбурашска фиякерияда”, а на 19 г. наступаю оркестри и фолклорни ансамбли.
На пияток, 24. юния, програми буду на Петровардинскей твердинї, дзе за ше за фестивалски награди буду змагац „Сримска банда” и „Зоруле” зоз Сербиї, „Ґарави” з Горватскей, „Чарногорски тамбураше” з Чарней Гори и „Могацки тамбурови оркестер” з Мадярскей.
У ревиялней часци на пияток наступи леґендарни Звонко Боґдан зоз своїма тамбурашами и оркестер „Дияко” з Дякова. Шицки спомнути програми безплатни за нащивительох.
На закончуюцим вечаре, на соботу, 25. юния, ше буду змагац „Бечки тамбураше” з Австриї, „Златна слиза” з Румуниї, „Памятка” з Горватскей, „БЛ Мерак” з Републики Сербскей и „Тайна” зоз Сербиї. За тот вечар уходнїца 500 динари у предпредаваню, а на сам дзень Фестивалу 700 динари.
Ревиялну часц Фестивалу, кеди буду преглашени и найлєпши ансамбли, означи новосадски „Герценшлус” зоз своїм „лалошским свинґом”, а на концу наступи Галид Бешлич зоз своїм оркестром и специялним госцом Зораном Калезичом.