БИКИЧ – Вчера, на швето Сошествиє Святого Духа, на Русадля по юлиянским календаре, у церкви Успения Пресвятей Богородици у Бикичу апостолски еґзарх за грекокатолїкох у Сербиї кир Георгий Джуджар предводзел Архиєрейску Службу Божу, а сослужовали о. Михайло Режак, парох у Шидзе и декан сримски, о. Владислав Варґа, парох у Сримскей Митровици и Беоґрадзе, о. Дарко Рац, парох у Бачинцох и домашнї парох о. Владимир Еделински Миколка.
У казанї преосвящени владика здогаднул на значенє швета Сошествиє Святого Духа у християнским живоце, а тиж и же тогорочне швето у церковней хронїки останє записане пре пошвецанє Пасторалного центру, хтори унапрями духовни живот у валалє.
Владика здогаднул и на шицких предкох котри допомогли збудовац церкву у тим фрушкогорским валалє и хтори збудовали моцни фундамент на тих просторох.
По Богослуженю процесия, на чолє з владиком и священїками пошла до нововибудованого Пасторалного центру, хтори владика кир Георгий пошвецел.
