ДЮРДЬОВ – Концом прешлого тижня секретар Месней заєднїци Дюрдьов Александар Голуб до Институту за явне здравє Войводини послал вимогу за анализу води з Еко-студнї, на хторей поставена и система за пречисцованє.
Понеже то закончуюца фаза роботи на вибудови Еко-студнї у центре Дюрдьова, после анализи, єй воду за пице годно хасновац. Студня будзе робиц нєпреривно и з трох (сензорских) чопох дньово будзе давац 10 кубики води.
Вибудов Еко-студнї почала 6. юния 2012. року, закончена є аж прешлого тижня, а 5 милиони 940 000 динари за тоту намену обезпечени з Покраїнского секретарияту за польопривреду, водопривреду и лєсарство. Студню вибудовал „Иринґ62” зоз Зренянину.