НОВИ САД – Лиґа социялдемократох Войводини (ЛСВ) вчера у Новим Садзе, у Сербским народним татру, отримала предвиберанкову конвенцию, на хторей лидер тей странки Ненад Чанак гварел же ше Лиґа заклада за политику чистих рахункох.
По його словох, политика чистих рахункох нє можлїва кед нє постої Завод за статистику Войводини, хтори би зазначовал кельо пенєжу з Войводини идзе до заєднїцкей републичней каси, як и цо ше збува з тим пенєжом.
– З тим би ше претаргло нагадованя же чи Войводина доприноши вецей, чи мєней, чи Войводина напредує, лебо назадує – гварел Чанак, наглашуюци же аж после того мож правиц стратеґийно добру политику, хтора може значиц виходзенє з кризи.
Предсидатель ЛСВ на конвенциї гварел и же тота странка анї за крочай нє одступи од своєй антифашистичней политики и оценєл же фашизем нє лєм у реґионє, алє у цалей Европи „почал дзвигац главу”.