РУСКИ КЕРЕСТУР – Початком того тижня предлужени роботи на оправяню Катедралней церкви св. оца Миколая у Руским Керестуре, хтори почали прешлого року. Тераз ше стару фасаду обива по сам верх церкви, а нова би мала буц положена до конца рока.
По словох предсидателя Церковного одбору мр Юлияна Фейдия, за предлуженє тогорочней роботи пенєж звекшого обезпечени, а то коло 60 000 еври, найвецей од донаторох з Керестура и з иножемства. Достати и 600 000 динари од Канцелариї за одношеня з церквами и вирскима заєднїцами при Министерстве правди, на основи конкурованя.
Обиванє малтеру указало ище и додатни проблеми, як цо то же треба оправиц удзверя на двоїх уходних дзверох, ришиц премаканє на уходней часци хлопского коврушу, а мушело ше подрезац и мури сахристиї процив влаги. Пре тоти дополнююци роботи парохиї потребни и дополнююци пенєж.
Роботи окончує подприємство „Слован” зоз Селенчи, а як гварел Фейди, наздаваю ше же до конца рока тота фаза роботох на катедрали будзе закончена.