НОВИ САД – После верификованя мандатох и даскельо павзох у роботи, на вчерайшей конститутивней схадзки Скупштини Городу Нови Сад за предсидателя Скупштини Городу вибрани Здравка Єлушич зоз Сербскей напредней странки (СНС).
За Єлушича гласали 48 одборнїки СНС, осем одборнїки коалициї СПС-ЄС, та по єден одборнїк Союзу войводянских Мадярох (СВМ) и Желєних, док седем одборнїки нє гласали, а 23 гласацки лїстки були нєважаци.
За заменїка предсидателя вибрана Бранка Бежанов зоз Сербского руху обнови, а за секретара Марко Радин зоз СНС.
На схадзки городски одборнїк з Лиґи социялдемократох Войводини Ненад Чанак задзековал на одборнїцке место, а одборнїца Руху „Досц було” Даниєла Костич напущела тот рух Сашу Радуловича и прешла до Єдинственей Сербиї.
Вибор городоначалнїка и Городскей ради будзе познєйше, а як пред конститутивну схадзку гварел актуални городоначалнїк Нового Саду Милош Вучевич, после формованя власци у Новим Садзе будзе випитане дїлованє дзепоєдних явних подприємствох и наявел змену одредзених директорох, без огляду на їх политичну припадносц.