НОВИ САД – На конференциї за новинарох у Заводзе за културу войводянских Руснацох, вчера, 13. децембра, представена нєзависна продукция Новинарскей асоцияциї Руснацох (НАР), проєкт „Доприношенє Руснацох розвою Нового Саду”. Слово о дзешец радио-емисийох у хторих представени дзешец особи котри за остатнї 50 роки допринєсли розвою Нового Саду у обласци култури, уметносци, инфраструктури и медийох.
У емисийох годно чуц цо сотруднїки и колеґове гваря о дїлу и особи Павла Жилника, Ивана Ковача, Дюру Папгаргая, Ирини Давосир Матанович, Ирини Гарди Ковачевич, Меланиї Римар, Михаила Дудаша, Мирослава Виславского и Мирона Канюха.
Проєкт реализую новинаре и члени НАР-у Єлена Перкович, Мария Перкович, Саня Маркович, Ася Папуґа, Анамария Ранкович, предсидателька НАР-у Мартица Тамаш и Ясна Ковач.
Бешедуюци о тим проєкту, Єлєна Перкович наглашела же вон зблїжел велїх людзох, алє и же на интернету, крем о Михаилови Дудашови, єст мало податки о спомнутих особох, та то треба виправиц. Саня Маркович гварела же нє було лєгко дойсц анї до собешеднїкох о заслужних особох, а ґу тому, з велїх требало вибрац дзешец.
Мартица Тамаш констатовала же емисиї о спомнутих буду на хасен нашей заєднїци и афирмативни за поєдинцох, як и други дотерашнї 11 проєкти НАР-у, док Анамария Ранкович потвердзела же тераз направена добра база за таки проєкти, алє присутна барз велька потреба за архиву податкох о заслужних особох.
Участвуюци на конференциї за новинарох, бувши директор Одбойкашского клубу „Войводина” и визначни спортски роботнїк и новинар Мирослав Виславски гварел же инициятиву того проєкту дожил як цошка добре и красне, а кед слово о нїм, як гварел – робел у интересу найширшей популациї, цо ше одражує и у националней заєднїци, чий дух требало и треба отримац.
Ирина Гарди Ковачевич заключела же нашому народу треба вецей анґажованя на промоциї своїх позитивносцох, а вшелїяк, значне и кед Руснаци похваля Руснацох там дзе то треба.
Сериял витворени з финансийну потримовку Городскей управи за културу Нови Сад, а партнер на проєкту Радио Нови Сад Радио-телевизиї Войводини.