НОВИ САД – Покраїнска влада того тижня прилапела информацию о витворйованю контрактох о софинансованю погонох за применьованє нових технолоґийох у Войводини, у хторей констатоване же тота програма пре вецей причини нєуспишно витворена.
Роботна ґрупа, хтора анализовала ефекти софинансованя проєктох у рамикох контрактох хтори подписали Покраїнски секретарият за науку и технолоґийни розвой и хаснователє средствох, утвердзела же тот проєкт мал вельо препущеня, цо обачиц и з реґресованьом у обласци обезпечованя роботи.
Податки указали же 37 одсто поглєдованьох хтори нєнаплацуюци нєадекватно обезпечени, а нєдостатки Програми ше найбаржей указали у самей реализациї контрактох. Хибела одвитуюца документация, прецизни процедури о рушаню документациї и роби, нє було одвитуюцих звитох и контроли витворйованя контрактох, а найвекши проблем бул нєдостаток жридлох средствох.