БЕОҐРАД – Зоз Службу Божу, хтору служели о. др Роман Миз и парох беоґрадски о. Владислав Варґа, вирни у Беоґрадзе внєдзелю, 24. мая, на швето св. Кирила и Методия, у полней церкви у Вишеґрадскей улїци преславели свой Кирбай.
Наказовал о. Миз, Апостол читал Йован Ауґустинчич, а свою першу причасц того дня прияли шестри Ивана и Валентина Няради, Борис Алексич и Михаил Кахан.
Присутних привитал парох о. Варґа, зоз жаданьом же би нас чували славянски апостоли св. Кирил и Методий, а о. Миз у своєй казанї гварел же тоти святитилє були насампредз християнє котри прияли заповид любови, зоз свидомосцу же зме шицки браца.
У пригодней кирбайскей програми зоз граньом, шпиваньом и молитву участвовали и першопричашнїки, як и члени КУД „Калїна” з Индїї, предводзени з предсидательом Дружтва Петром Закамароком.
За аґапе, добре розположенє и друженє ше остарали любезни домашнї Беоґрадянє, хторим пришли госци з велїх местох, медзи нїма и чолнїки Националного совиту Руснацох – заменїк предсидателя Йовґен Мудри и предсидатель Вивершного одбору Совиту Желько Ковач.
