БЕОҐРАД – Схадзка Совиту за национални меншини Влади Републики Сербиї, хтора мала буц отримана вчера у Палати „Сербия” у Беоґрадзе и хтору зволала предсидателька Совиту, министерка державней управи и локалней самоуправи Ана Брнабич – одложена, гоч на схадзки присуствовали 26 з 28 членох Совиту – сообщело вчера Министерство державней управи и локалней самоуправи.
Як пише у сообщеню – при прилапйованю дньового шору, предшедуюци Координациї националних совитох (НС) Сулейман Уґлянин, котри и предсидатель НС Бошнякох, у мено Координациї вимагал же би ше зняло три точки з дньового шору, хтори ше одноша на звит о Акцийним планє за витворйованє правох националних меншинох, на Нарис закона о вименкох и дополнєньох Закона о защити правох и шлєбодох националних меншинох и на Предлог приоритетней обласци финансованя за 2017. рок з Буджетного фонду за национални меншини.
Предсидателька Совиту Ана Брнабич, як то по Дїловнїку, вимагала же би ше члени Совиту вияшнєли о тим предкладанаю, понеже то, як поведзене у сообщеню – три ключни теми о правох националних меншинох у Сербиї и же нє ясне прецо НС-ти о нїх нє жадаю дискутовац. У сообщеню з Министерства после нєотриманей схадзки поведзене и же шицки учашнїки могли уплївовац на дньови шор, бо им є доручени тидзень пред схадзку.
У сообщеню стої же за предложени дньови шор гласали предсидателє НС-ох болгарскей, бунєвскей, ромскей, чарногорскей и єгипетскей меншини и представителє Влади, хторих, попри министерки Брнабич представяли министерка правди Нела Кубурович, державни секретаре у министерствох просвити, та култури и информованя, як и вонкашнїх дїлох, директор Управи за сотруднїцтво з церквами и вирскима заєднїцами и директорка Канцелариї за людски и меншински права Сузана Паунович. На схадзки присуствовал и Владимир Божович, совитнїк у Кабинету предсидателя Влади.
Понеже векшина предсидательох НС-ох нє гласала за предложени дньови шор, схадзка Совиту за национални меншини одложена.
У писаним сообщеню з Министерства державней управи и локалней самоуправи сообщене и же вчерайшу схадзку означело и нєпримеране обрацанє предсидателя НС Албанцох Йонуза Муслиюа ґу министерки Ани Брнабич, котра здогадла же тема схадзки нє вименки горе спомнутого акцийного плану, алє його запровадзованє.
У пририхтованю Акцийного плану участвовали представителє шицких НС-ох, як и представителє ОЕБС-у и Совиту Европи, а прилапени є 3. марца 2016. року – гвари ше у сообщеню з Министерства после вчерайшого сходу.