ВЕРБАС – Пияток, 16. децембра, отримана 31. схадзка Скупштини општини (СО) Вербас, на хторей з векшину гласох прилапени шицки 14 точки дньового шору, хтори, на предкладанє предсидателя Општини Милана Ґлушца, бул дополнєни и з Одлуку о порушованю поступку ликвидациї ЯП за информованє Вербас, преноши портал Општини Вербас.
На схадзки прилапени ребалансу буджету Општини Вербас за 2016. рок, за хтори Ґлушац гварел же Општина у 2016. року значну часц приходох унапрямовала на вимирйованє обовязкох спрам добавячох. За исту намену у 2015. року општина з буджету видвоєла вецей як 196 милиони 850 000 динари, а у тим року з цалосного буджету, хтори виноши 967 милиони 652 912 динари, за виплацованє обовязкох спрам добавячом потрошени 236 милиони 963 638 динари.
Опозицийни одборнїки зоз СДС критиковали одлуку Надпатраюцого одбору ЯКП „Комуналєц” з хтору вецейраз звекшани ценовнїк за дзешецрочне закупйованє гробних местох, на цо член Општинскей ради Ґоран Пейович гварел же уж нєшка з представителями ЯКП „Комуналєц” о тим будзе отримана схадзка.
На СО бешедоване и о стану у Явним подприємстве за превоз путнїкох Вербас, хторе тих дньох у вельких проблемох, алє конкретни ришеня нє понукнути.
На схадзки СО место Ґордани Новакович за нового директора Апатики Вербас менована Єлена Дюрович, а место дотерашнього о.д. директора ЯП за превоз путнїкох Вербас Чеду Субашича, тоту длужносц будзе окончовац Оґнєн Василєвич.
