ШИД – На вчерайшей пиятей схадзки Скупштини општини (СО) Шид одборнїки принєсли Одлуку о вименкох и дополнєньох Одлуки о буджету Општини Шид, з хтору прерозподзелєни средства пре звекшанє розходох.
Спрам тей одлуки вкупни приходи виноша милиярду 204 милиони 597 660 динари, чечуца буджетна резерва 15 милиони динари, стаємна штири милиони, так же розпоредзени средства од милиярду 185 557 660 динари.
Тиж принєшена и одлука о утвердзованю надополнєньох предсидательом и членом управних и надпатраюцих одборох, по хторей предсидателє буду доставац 6 000, а члени 5 000 динари мешачно.
Значна и одлука о витворйоваю правох з обласци социялней защити, спрам хторей гражданє годни доставац помоц прейґ лиценцованих орґанизацийох прейґ системи явней набавки, кед помоц нє годни достац од Центру за социялну роботу.
Одборнїки СО Шид принєсли и нову одлуку о додзельованю материялней помоци школяром и студентом з општинского буджету, а з хтору прецизоване же найзначнєйши критериюм будзе витворени успих у ученю (школяра, лєбо студента), а нє материялни стан фамелиї и дефицитарносц факултету.
СО вчера розришела дотерашнього о.д. директора Установи за физичну културу „Партизан” Драґана Яндрича пре виходзенє мандату, а на його место меновала дипл.економисту зоз Шиду Младена Арсеновича.
Тиж меновани и нови управни и надпатарюци одбори у подприємствох и установох хторим снователь локална самоуправа.