БИКИЧ – Тогорочна манифестация „Пришли нам Русадля” у Бикичу вчера почала з отвераньом етно-вистави и етно-штандох шейсц здруженя женох, а после духовней часци, на хторей пошвецени и новозбудовани Пасторални центер. Манифестация у Календаре репрезентативних манифестацийох Руснацох Националного совиту.
У Доме култури отримани концерт хтори пририхтали Културно-просвитне дружтво „Иван Котляревски” з Бикичу, Културно-просвитне дружтво „Дюра Киш” зоз Шиду и Културно-просвитне дружтво „Драґутин Драген Колєсар” з Бачинцох.
После програми предсидатель спомнутого дружтва и Совиту Месней заєднїци Бикич Деян Бобаль и Мирослав Буйда з Бардейова, зоз Словацкей, у заградки опрез Дому култури посадзели три младнїки брези, хтори принєсли зоз старого краю.
Манифестация закончена з традицийним валяньом „майского древа”, а пред тим ше опрез и коло нього шпивало и танцовало.
На тот шветочни дзень у Бикичу була делеґация з Бардейова, зоз Словацкей Републики, на чолє з Мирославом Буйдом, предсидатель Националного совиту Руснацох Славко Рац, директорка НВУ „Руске слово” Мартица Тамаш, началнїк Општинскей управи Шид Ромко Папуґа, предсидатель Союзу Руснацох Українцох Сербиї Боґдан Виславски и други госци.
