НОВИ САД – Найвекши проблем у запровадзованю нового Закона о задруґох то упис задружней власносци над нєрухомосцами, насампредз польопривредней жеми, хтора евидентована як дружтвене власнїцтво.
У Задружним союзу Войводини гваря же у тим случаю ришеня о упису задружней власносци над польопривредну жему приноши Републични ґеодетски завод. Медзитим, процес врацаня жеми задруґом спомалшени, понеже ше збува же явне правобранительство придава пригварки на принєшени ришеня.
– Кед правобранительство нє прида жалбу, вец воно, лєбо Министерство польопривреди, вимагаю докази же слово о задружней власносци. То би нє требали робиц, понеже катастар то роби сам з увидом до документациї – гварела секретарка Задружного союзу Єлена Несторов Бизонь.
Гоч принєшени добри закон о задруґох, проблеми у процесу преводзеня дружтвеного до задружного власнїцтва спомалшую розвой задружного сектору.