ПРАГА (ЧЕСКА) – Репрезентация Сербиї, у хторей и школярка з Руского Керестура, Леонела Цифрич, штварта у Европи на змаганю з транспорту за школярох од 10 до 12 роки, а тогорочне 31. Европске змаганє отримане у Ческей, у Усти на Лаби нєдалєко од Праги.
У моцней конкуренциї екипох з 23-ох европских державох, хтори творели по два дзивчата и двоме хлапци, репрезентация Сербиї завжала одличне 4. место зоз 600 бодами, цо барз добри успих. Перше место освоєла Летония зоз 612, друге єдна з двох екипох з Русиї – Русия РАС зоз 610, а треце Ческа зоз 604 бодами.
Попри дванацрочней Леонели Цифрич, котру за змаганє пририхтовал и провадзел наставнїк у керестурскей Школи „Петро Кузмяк” Зденко Шомодї, члени нашей репрезентациї були и дванацрочна Миляна Веселинович з Нишкей Банї, дзешецрочни Никола Йович з Нишу и єденацрочни Петар Лукич зоз Сримскей Митровици.
Кажди учашнїк на змаганю достал по 25 рижни награди (маїци, шапки, руксаки, шлєми…), а награда им була и екскурзия после змаганя – єднодньови плїв по рики Лаби з рижнородну програму, як на ладї так и по побрежю и у городох дзе ладя ставала.
Шлїдуюце Европске першенство нарок будзе у Албаниї.