ГЛОЖАНИ – У амфитеатру на отвореним, хтори состойна часц Спортско-рекреативно-просвитного центру у Гложанох, на 49. Фолклорним фестивалу „Танцуй, танцуй…” наступела и фолклорна ґрупа ветеранох зоз Руского културного центру (РКЦ) з Нового Саду.
Традицийно Фестивал „Танцуй, танцуй…” почина зоз шветочним дефилеом по улїцох Гложанох, дзе ше на каждей крижней драги заграло и потанцовало, та и Руснаци одтанцовали „парадичу”. Зоз приходом до амфитеатру, шветочно подзвигнута застава Фестивалу и на бини ше зменьовали танєчни ансамбли.
Медзи вецей як 20 фолклорнима ґрупами зоз местох у хторих Словаци маю здруженя, та и зоз иножемства, у ревиялней часци зоз „Рускима танцами” на бини наступела фолклорна ґрупа ветеранох зоз РКЦ.
Фестивал „Танцуй, танцуй…” отримани, 15. юния, а циль му пестованє и очуванє музики, шпиванки, танцох и обичайох Словакох.
