КОЦУР – Вчера у нових просторийох Месней орґанизациї инвалидних и других пензионерох у Коцуре орґанизована добродзечна роботна акция, на хторей члени Здруженя омалтеровали и позамасцали вонкашнї мури пензионерского дому, збудовали рампу за слабо рухоми и особи у кочику, як и нови ґарадичи пре лєгчейше уходзенє пензионерох до своїх просторийох.
Як гварела предсидателька Здруженя Андя Хромиш, материял за спомнути роботи финансовала Месна заєднїца Коцур, а по єшень заплановане и билєнє фасади, цо будзе финансоване з донацийох Коцурцох и людзох добрей дзеки.
Од кеди отворени нови просториї – членство Здруженя ше звекшало, наглашела Хромишова, а сотрдузую и з младима, бо тоти просториї за свойо активносци хаснує и Коцурске здруженє младих.