БЕОҐРАД – Вчера, 9. марца, директор Заводу за културу войводянских Руснацох (Завод) мр Серґей Tамаш мал роботну схадзку зоз др Миряну Менкович, директорку Етноґрафского музею и єй сотруднїцу Александру Левнаич, началнїцу Оддзелєня и висшим кустосом. У роботней часци схадзки участвовали и др Миряна Джекич и Деян Радованович зоз Покраїнского заводу за защиту памятнїкох култури.
Главна тема схадзки, цо и єден од главних стратеґийних роботних приоритетох и активносци Заводу у тим року, промоция и презентация Руснацох и рускей националней заєднїци у Етноґрафским музею у Беоґрадзе од 14. по 31. авґуст.
Концепцийно порадзене и заплановане же би ше през штири розлични програмски змисти представело тото цо найлєпше и найрепрезентативнєйше при войводянских Руснацох. За таку файту промоциї, хтору потераз мала лєм словацка национална меншина, потребна заєднїцка координация и уключованє шицких наших институцийох.
На схадзки догварене же шицки поєдиносци самей промоциї, як и будуци напрямки и можлївосци заєднїцкого фахового сотруднїцтва помедзи Заводом и Музейом, хтори установи култури од националного значеня, буду облапени у Спорозуменю хторе будзе подписане у наиходзацим чаше.
