ДЮРДЬОВ – На поволанку дириґента Винфрида Бентела з Лудвиґсбурґу, Церковни хор „Розанов“ з Дюрдьова од нєшка на штиродньовим госцованю у Нємецкей, у Лудвисбурґу.
У римокатолїцкей Церкви Пресвятей тройци дюрдьовски парох о. Йоаким Холошняй и о. Борис Холошняй з Бечу нєшка буду служиц византийску славянску литурґию, на хторей будзе шпивац Хор „Розанов“.
На ютре дополадня Хор будзе мац концерт у Каплїчки Мариянского шпиталю, а на вечар, у Церкви Богородичней милосердносци будзе шпивац даєдни часци Майского молебену, хтори будзе служиц кардинал Карол Йозеф Раунбер.
На нєдзелю „Розанов” тиж будзе мац два наступи – дополадня у Церкви св. Павла будзе шпивац часци Служби, а на вечар у истей церкви отрима цаловечарши концерт восточно-церковней духовней музики.
Члени хору „Розанов“ ше з дириґентом Винфридом Бентелом упознали прешлого року на фестивалє церковней музики у Польскей и понеже їх шпиванє на ньго охабело барз добри упечаток, вон их поволал до Лудвиґсбурґу и орґанизовал пребуванє и наступи.