НОВИ САД – Покраїнски секретарият за науку и тейнолоґийни розвой прешлого тижня розписал 12 конкурси з обласци науки, технолоґийного розвою, високого образованя и студентского стандарду, за хтори опредзелєни 450 милиони динари.
Ресорни секретар Владимир Павлов гварел же, гоч покраїнски буджет од 20 до 50 одсто менши, Секретарият будзе окреме потримовац участвованє науково-виглєдовацких роботнїкох и студентох на наукових сходох у иножемстве, та проєкти популаризациї науки и нових технолоґийох хтори буду витворйовац нєвладово орґанизациї.
Того року Секретарият будзе софинансовац орґанизованє науковофахових сходох, алє лєм медзинародного характеру на териториї Войводини. Як и скорей, обезпечени и средства за приявйованє проєктох за реализацию акциї „Право на першу шансу”.
Гоч прешлих рокох обезпечена робота за 40 докторох наукох, Павлов визначел же значносц же би анї єден доктор нє бул без роботи, та ше на тим окреме будзе робиц у идуцих двох рокох.
За обласц технолоґийно розвою опредзелєни 240 милиони динари за софинансованє програмох за применьованє нових технолоґийох у АП Войводини, а средства обезпечени и за софинансованє образованя талантованих студентох и реґресованє драгових трошкох студентом.
Информациї о активних конкурсох мож опатриц на сайту https://apv-nauka.ns.ac.rs