РУМА – Пияток, 8. априла, у Завичайним музею Рума отворена вистава руского облєчива „Ружа на хусточки”, а тирва по 22. април. Вистава „Ружа у марами-Ружа на хусточки” проєкт Музею Сриму и Дружтва Руснацох у Сримскей Митровици.
Авторе вистави кустос у Музею Сриму Владимир Перич и музейна совитнїца Оливера Делич‚ котра и секретар Дружтва Руснацох у Сримскей Митровици.
Деличова у Руми и отворела виставу и наглашела же през облєчиво жадали приказац часц рускей традициї и култури, односно як ше дакеди облєкали жени, дзивки и хлопи и яки материяли хасновали за шмати, прейґ хторих визначовани и статус у дружтве.
Проєкт Креативней роботнї Дружтва Руснацох у Сримскей Митровици и Музею Сриму на хторей настала вистава финансовало Министерство култури и информованя Влади Републики Сербиї.