СЛОВАЦКА – Русински як свой мацерински язик на предшколским и основношколским уровню у тим школским року у державних установох у Словацкей виучую уж лєм 58 школяре, гоч по чишлє жительох Русини у тей жеми треца национална меншина, преноши портал русинФОРУМ у розгварки з портпаролку Министерства школства Беату Дупальову.
Як гварела Дупальова, у тим школским року настава русинского язика, вєдно зоз словацким, орґанизована лєм у основней школи з дзецинску заградку у Калней Розтоки, дзе на предшколским уровню єст 16 дзеци, а на основношколским 19 школяре. Тиж и у Чабини, дзе у предшколскей настави русински язик виучую 10, а у основней школи 13 школяре.
Русински язик у школох мож виучовац од школского 19997/98. року, скорей було вецей школярох у вецей местох, медзитим, пре вше менше число дзецох вообще, алє ище баржей пре нєзаинтересованосц родичох же би їх дзеци виучовали русински язик, тераз то лєм у спомнутих двох державних школох.
Обчекованє же тото злєпша нови закон о школстве, пре иншаке финансованє школох з меншим числом школярох дзе ше виучує и даєден язик националней меншини.
– Од самого початку уводзеня русинского як мацеринского язика проблем барз мала заинтересованосц школярох, прето прейґ програми Уряду Влади „Култура народносних меншинох”, од 2013. року з 30 000 еври финансуєме „Вечарши школи русинского язика” за старших и за дзеци. Таки школи робя у осем валалох и городох, а попри тим же дзеци уча русински язик, у нїх и одроснути уча свой мацерински язик и писмо, односно кирилку. Прейґ того проєкту пробуєме пребудзиц интересованє дзецох и родичох за ученє русинского язика у державних предшколских и основношколских установох – гварела Дупальова.
Проєкт „Вечарши школи” витворює Здруженє интелиґенциї Русинох Словацкей.