РУСКИ КЕРЕСТУР – Внєдзелю, 14. фебруара, керестурски Русин на своїм терену страцел и друге приятельске змаганє у пририхтованю пред початком ярнєй часци першенства, тераз од „Твердинї” з Бачу, хтора у висшим ранґу змаганю.
Резултат на концу бул 2:4, а ґоли за Русин дали М. Кулич з пеналу и Я. Кулич.
Як гварел тренер Русину Златко Саянкович, нє обтерховани су и з другим пораженьом, понеже ище вше нє почали тренирац и бавиц шицки бавяче першей екипи. Внєдзелю почал бавиц и Деян Павлович, котри на нєдавно отриманей Скупштини Спортского дружтва Русин преглашени за найлєпшого бавяча у Клубу и у цалим Дружтве за прешли рок.
На нєдзелю, 21. фебруара Русин знова у Керестуре одбави приятельске змаганє, а госцує Искра з Коцура. Змаганє почнє на 14 годзин.