СЕЧАНЬ – На вчерайшим другим дню змаганя рецитаторох на Покраїнскей смотри у Сечню, у катеґориї штреднього возросту Валентина Салаґ з Дюрдьова виборела пласман на Републичну смотру, а медзи 23-оїма найлєпшима у Войводини, котри достали Златни дипломи и Матей Шепински з Руского Керестура. Попри нїх, по руски ше змагала и Валентина Михняк з Дюрдьова.
У конкуренциї рецитаторох штреднього возросту (школяре од пиятей по осму класу ОШ) на Покраїнскей смотри вчера участвовали 62-ойо рецитаторе з писнями по сербски, мадярски, словацки, руски и горватски.
Шейсцчленови жири вибрал 23-оїх найлєпших у Войводини, а вец з нїх и дзевецерих котри идуцого мешаца Войводину буду представяц на Републичней смотри у Валєвє. Медзи тима дзевецерима и Валентина Салаґ з Дюрдьова.
Нєшка на Смотри будзе змаганє рецитаторох у катеґориї старшого возросту, дзе ше змагаю и штверо по руски – за Руски културни центер з Нового Саду наступя Александер Планкош и Мирослав Малацко, а пре нєшкайши обовязки, жири штварток уж вислухал Тимеу Будински и Леонтину Штефанко з Керестура.