РУСКИ КЕРЕСТУР – Каратисти Карате клубу (КК) „Русин” у 2015. року участвовали на покраїнских, републичних, та шветових змаганьох, дзе освоєли вєдно 32 медалї, визначене на Рочней скупштини Клубу всоботу, 9. януара. На сходзе представени резултати роботи Клубу у 2015. року, та похвалєни и наградзени найуспишнєйши каратисти.
За найуспишнєйшу каратистку у прешлим року преглашена Сара Планчак, котра на Шветовим купу у каратеу освоєла перше место у борбох у поєдинєчней конкуренциї.
Спомедзи 32 освоєних медальох 13 златни, 8 стриберни и 11 бронзово, а каратисти котри ше найбаржей визначели то Сара Планчак, Мартина Рац, Марина Надь, Анамария Няради, Анастазия Фаркаш, Александар Гарди, Андрей Дудаш, Теодор Няради и Ґлориян Штранґар од Општини Кула достали и пенєжни награди.
Предсидатель и тренер КК „Русин” Михайло Орос визначел же з преходзеньом до спортскей гали условия тренированя злєпшани, Клуб достал на квалитету тренинґох, та прицагнул и векше число дзецох.
На Рочней скупштини за предсидателя КК „Русин” знова вибрани Михайло Орос, попри нього у Управним одборе буду Вероника Юрич и Янко Няради, а у Надпатраюцим Дюра Планчак, Тихомир Фейди и Павле Малацко. На Скупштинин присуствовал и предсидатель Спортского дружтва „Русин” Драґан Ковачевич.
КК „Русин” ше финансує з месного самодоприносу и буджету Општини Кула, а Орос з тей нагоди подзековал спонозором и родичом дзецох котри тиж помагаю и потримую роботу Клубу.
