БЕОҐРАД – Медзинародни саям кнїжкох, хтори з мотом „Кнїжки до рукох” у Беоґрадзе отримани од 23. по 31. октобер, нащивели 188 409 любителє кнїжки, сообщели вчера орґанизаторе, а преноши Танюґ.
На Сайме кнїжки викладали 480 директни викладаче (викладаче и совикладаче), медзи нїма и НВУ „Руске слово” (на штанду Покраїнского секретарияту за образованє, предписаня, управу и национални меншини-заєднїци), з хторих 412 були домашнї и 68 з иножемства, так же ше представели 1 002 фирми.
На Сайме кнїжки викладали видавателє зоз Сербиї, Билорусиї, Босней и Герцеґовини, Индиї, Израїлу, Мадярскей, Япону, Китаю, Русиї, Словениї, Горватскей, Чарней Гори и Ческей, а госц бул Иран. Саям провадзели и 1 207 акредитовани новинаре друкованих и електронских медийох з тих державох.
У рамикох Медзинародного сайму кнїжкох отримани и 573 рижни програми, 11 вистави, та Фестивал творчосци младих, хтори мал дзевец програми, а додзелєни и награди и припознаня найлєпшим видавательом, кнїжком, стрипом, дизайнером.