НОВИ САД – На основи 97,7 одсто обробеного виберанкового материялу, Покраїнска виберанкова комисия (ПКВ) вчера сообщела же после нєдзельових виберанкох до Скупштини АП Войводини уходза осем з 15 лїстинох хтори участвовали на виберанкох. Найвецей, 44,5 одсто гласох од гражданох Войводини котри вишли на виберанки достала лїстина „Александар Вучич-Сербия победзує”, хтора будзе мац 63 зоз 120 мандатох зволаня покраїнскей Скупштини. На покраїнских виберанкох гласали 56 одсто з милион 729 201 граждана.
Лїстина „Ивица Дачич-Социялистична партия Сербиї (СПС), Єдинствена Сербия- Драґан Маркович Палма (ЄС), Патриотски рух Сербиї (ПРС)” достала 8,85 одсто, односно 12 мандати, а „Др Воїслав Шешель-Сербска радикална странка” 7,66 одсто, лєбо 10 мандати. Исте число покраїнских посланїкох будзе мац и лїстина „За Войводину роботи и знаня-ДС (Демократска странка), ДСГВ (Демократски союз Горватох у Войводини), Нова, ЗЕП-Желєни-Др Боян Пайтич”, хтора достала 7,24 одсто гласох.
Виберанкова лїстина „Ненад Чанак-Лиґа социялдемократох Войводини-Дзвигнї главу!” достала 6,43 одсто, цо ноши 9 мандати, а лїстина „Досц було-Саша Радулович” будзе мац 7 посланїкох, понеже достала 5,44 одсто гласох.
З меншинских лїстинох, „Союз войводянских Мадярох-Иштван Пастор” достал 4,87 одсто гласох и 6 мандати, „Мадярски рух за автономию-др Тамаш Корхец- ДЗВМ-Арон Чонка” 1,71 одсто и 2 мандати, а „Желєна странка” 1,14 одсто и єден посланїцки мандат.
На покраїнским уровню спод цензуса остали коалицийни лїстини „Двери- Демократска странка Сербиї-Санда Рашкович Ивич-Бошко Обрадович” (3,24%) и „Борис Тадич, Чедомир Йованович-Союз за лєпшу Войводину-Либерално демократска партия, Социялдемократска странка” (2,78%).
Терашнї виберанки за Скупштину Войводини отримани лєм по пропорцийней системи.