СО Кула прилапела инвестицийни буджет

автор зам
852 Опатрене

КУЛА – Главна точка вчерайшого зашеданя Скупштини општини (СО) Кула була прилапйованє ребалансу општинского буджету за 2015. рок, хтори, як наглашене, у одношеню на скорейши – инвестицийни, понеже за укладаня опредзелени коло 380 милиони динари.

Ребаланс принєшени пре звекшанє приходох, бо за перши три тогорочни мешаци виноша 274 милиони динари, цо за коло 90 милиони вецей у одношеню на исти период прешлого року. Цалосни буджет Општини Кула тераз плановани на милиярду 332 милиони динари.

Ребаланс буджету детально потолковал заменїк предсидателя Општини Кула Велибор Милоїчич, як и кредитне задлужованє Општини за нєдоставаюци 2,4 милиони еври за вибудуов поцискуюцого воду Червинка-Кула и за законченє вибудови канализацийних мрежох у спомнутих двох местох. Инициялни пенєж за кредит коло 500-600 000 еври у буджету з еколоґийней такси, а як наглашел и Милоїчич и други бешеднїки, з тим конєчно будзе ришени длугорочни проблем заґадзеносци Велького бачкого беґелю и його Беґейцу.

И вчерайшу схадзку означел одборнїк Єдинственей Сербиї (ЄС) Драґутин Медоєвич, перше з предкладанями за преширенє дньового шору, цо нє прилапене, а познєйше з частима репликами, поволованьом на повредзованє Дїловнїка о роботи, местами и оштрейшу и нєпримерану полемику з одборнїками, так же є од предшедуюцей, предсидательки СО Кула Снежани Мркаич, вецей раз опоминани.

Одборнїки вчера прилапели и шицки други 12 точки з предложеного дньового шору.

ПОВЯЗАНИ ТЕКСТИ