РУСКИ КЕРЕСТУР – Под предшедованьом його предсидателя Звонка Салаґа з Дюрдьова, у просторийох Националного совиту (НС) Руснацох вчера отримана конститутивна схадзка Роботного цела за спорт НС, як єдного з нових орґанох Совиту у тим зволаню, понеже Одбор за младеж и спорт з прешлого мандату тераз роздзелєни на два роботни цела.
Попри спомнутого предсидателя, на схадзки присуствовали шицки члени Роботно цела – Иван Папуґа з Вербасу, Юлиян Ковач зоз Шиду, Кирил Симунович зоз Суботици и Борис Шайтош з Руского Керестура. На схадзки присуствовали и предсидатель Вивершного одбору НС Желько Ковач, секретар Совиту Таня Арва Планчак, як и член НС з Керестура Владимир Олеяр.
После прилапйованя Дїловнїка о роботи Роботного цела, у хторим одредзене же ше воно стара о Спортских бавискох (СБ) „Яша Баков”, прилапени и план роботи за 2015. рок, у хторим предвидзене же у рамикох СБ того року буду отримани змаганя у тринац спортох у вецей нашим местох.
Прилапени и финансийни план на 200 000 динари, кельо за СБ було опредзелєне и прешлого року, а чи за можлїви други спортски активносци и стретнуца, як цо то участвованє на дзепоєдних медзинародних змаганьох Руснацох, о чим тиж бешедоване на Роботним целу, у тим року будзе опредзелєне и вецей – одредзи НС.
Члени Роботного цела за спорт НС наглашели же СБ „Яша Баков” нє лєм спортски аматерски змаганя, алє свойофайтови рух прейґ хторого ше на одредзени способ тиж пестує национални идентитет Руснацох у нашей жеми, та и ширше, понеже на нїм участвую и Руснаци з Горватскей. Прето предложене же би подручни канцелариї НС мали одредзену обовязку старац ше и о тим сеґменту активносцох по наших местох.
Як поведзене на схадзки, перше тогорочне змаганє будзе у кошарки „три на три” у Дюрдьове, у марцу, а Владимир Олеяр на схадзки винєсол же у рамикох СБ у Руским Керестуре 25. априла будзе отримани Медзинародни турнир аматерох у одбойки, понеже буду участвовац и екипи зоз Свиднїку, зоз Словацкей и з Ужгороду, з України.
