НОВИ САД – Найлєпши студенти Универзитета у Новим Садзе, їх 303, пондзелок подписали контракти о стипендованю, а стипендиї Доситея им уручел министер младежи и спорта Ваня Удовичич, городоначалнїк Нового Саду Милош Вучевич и о. д. ректора Универзитета у Новим Садзе Радован Пеянович.
Стипендисти Фонда за млади таланти достали стипендиї у суми од 30 тисячи динари котри буду доставац єден рок.
Визначуюци же му чесц же други раз особнє уручує стипендиї младим талантом, Удовичич гварел же „тоти млади людзе доказ же Нови Сад и Сербия маю будучносц, же ше од нїх обчекує же би превжали руководзенє зоз державу и же є сиґурни же вони у тим буду успишни”.
Цо ше дотика тих хтори студиї предлужа у иножемстве, Удовичич гварел же ше од нїх обчекує же би позберали знанє там дзе пойду, а док законча студиї же би тото знанє применєли у Сербиї.