КОЦУР – У Манастире шестрох Служебнїцох у Коцуре вчера, на швето священомученїка Йосафата преславени Кирбай, а понеже шестри того року преславели 100-рочнїцу приселєня до Коцура, бул то стоти Кирбай у манастире.
З нагоди Кирбаю у каплїчки манастиру служена Архиєрейска Служба Божа хтору предводзели двоме владикове – наш апостолски еґзарх Георгий Джуджар и апостолски еґзарх за католїкох восточного обряду и владика скопского владичества за римокатолїкох у Македониї Киро Стоянов. З нїма сослужели штирме священїки з наших парохийох у Коцуре и Керестуре, як и о. Зоран Стоянов з Македониї.
На Служби присуствовали числени шестри и парохиянє, а обидвоме владикове им у казанї повинчовали Кирбай и швето.
Пред Службу виронаучни дзеци рецитовали, шпивали, пречитали животопис св. Йосафата и кратку историю коцурского манастиру, а потим привитали владикох.
По Служби вирнїки могли побочкац часц мощох св. Йосафата, хтори були виложени у каплїчки.
