КОЦУР – За школярох першей класи Основней школи „Братство єдинство” вчера у Коцуре орґанизоване стретнуце з писательом за дзеци Тодетом Николетичом, а з нагоди початку нового школского рока. Стретнуце орґанизовала Народна библиотека „Данило Киш” з Вербасу, а отримане є у коцурскей Читальнї.
Николетич схопно анимировал дзеци, так же на тим интерактивним стретнуцу шпивали и рецитовали, слухали його писнї, а вон им подзелєл и кнїжочки до хторих можу залїпиц свою фотоґрафию, написац свой перши розпорядок и перши букви, цо им будзе памятка на их перши днї у школи.
Як за Рутенпрес гварел Николетич, Библиотека „Данило Киш” таки стретнуца орґанизовала и у других школох у местох вербаскей општини.
