МИКЛОШЕВЦИ – Стретнуце руских школох, 21. по шоре, будзе отримане 6. юния у Подручней школи Миклошевци, хтора припада матичней школи Чаковци, у Републики Горватскей – одлучене на вчерайшей схадзки Орґанизацийного одбору у миклошевскей Школи.
У мено орґанизатора Стретнуцох руских школох – Дружтва за руски язик, литературу и културу, на схадзки присуствовали Ирина Папуґа з Нового Саду, подобова уметнїца и членїца Дружтва Мария Канюх, учитель у пензиї и предсидатель Секциї Дружтва у Миклошевцох Дюра Лїкар, потим директорка Основней школи Чаковци Ана Мария Зулич, учителька мацеринского язика у Миклошевцох Леся Мудри, миклошевски учительки у пензиї Ксения Лїкар и Мария Папуґа, парох миклошевски о. Яким Симунович и предсидатель Ради рускей националней меншини и доначалнїк Општини Томповци Мирослав Лїкар.
Директорка ОШ Чаковци Ана Мария Зулич виражела задовольство же Стретнуце будзе отримане у Миклошевцох, а гварела же Школа и обовязна сотрудзовац з представителями рускей и мадярскей националней меншини на подручу Општини Томповци. З тей нагоди Ирина Папуґова поинформовала Зуличову о роботи Дружтва и школскей библиотеки подаровала два його виданя.
Члени Орґанизацийного одбору ше догварели о детальох вязаних за змист програми, чишлє учашнїкох и финансийней потримовки, а о тих и других питаньох ище будзе бешеди на будуцих схадзкох членох Орґанизацийного одбору з Миклошевцох.