Того викенду „Петровски дзвон” у знаку вецей рочнїцох

автор зам
978 Опатрене

ПЕТРОВЦИ – На пияток, 5. юния, у Петровцох почина 42. „Петровски дзвон”, найвисша културна манифестация Руснацох у Републики Горватскей (РГ). „Петровски дзвон” будзе закончени на нєдзелю, 7. юния, орґанизую го Союз Русинох РГ Горватскей и КУД „Яким Гарди” з Петровцох, под покровительством Совиту за национални меншини РГ, а з финансийну потримовку Вуковарско-сримскей жупаниї и Општини Боґдановци.

Штерацец други „Петровски дзвон” будзе отримани у рамикох означованя 65-рочнїци КУД „Яким Гарди” з Петровцох, 85 рокох народзеня Силву Ерделя, 85 рокох народзеня Владимира Костелника и 85 рокох народзеня Йозафата Колбаса, чийо ювилеї буду окреме означени на соботу, на Музично-литературним вечаре Руснацох у РГ.

Манифестация почнє на пияток вечар з приказом рубаня майского древка у Етноґрафскей збирки, на соботу пополадню будзе фодбалске змаганє ветеранох ФК „Петровци” и „Русину” з Руского Керестура, потим отверанє вецей виставох подобових роботох и фотоґрафийох авторох Руснацох з Горватскей, а пред спомнутим Музично-литературним стретнуцом будзе и промоция вецей кнїжкох.

На нєдзелю, после дополадньовей Служби Божей у петровскей церкви, на 11 годзин почнє манифестация дзецох „Петровски дзвончок”, а на 15 г. смотра музично-фолклорней творчосци Руснацох у Горватскей и їх госцох „Петровски дзвон 2015”.

Як наявене, госци „Петровского дзвону” буду ансамбл „Кичера” з Медзилаборцох, зоз Словацкей, КУД „Дюра Киш” зоз Шиду, зоз Сербиї, та ансамбли з Горватскей – „Напредак” з Подравских Подґайцох, „Шокадия” з Липовцу, „Петефи Шандор” з Ласлова, ансамбл Чехох з Бєловару, Матки словацкей з Илоку, а манифестация на нєдзелю будзе закончена з цаловечаршим концертом КУД „Лєсаре” з Винковцох.

 

ПОВЯЗАНИ ТЕКСТИ