РУСКИ КЕРЕСТУР/ШИД – Того викенду, 1. и 2. октобра, у Руским Керестуре и Шидзе буду аж три манифестациї значни за Руснацох нє лєм у нашей жеми, алє и у иножемстве – у Руским Керестуре 55. Фестивал рускей култури „Червена ружа“ и означованє 200-рочнїци народзеня Петра Кузмяка, а у Шидзе перши Медзинародни мултижанрови фестивал руского филму „Русин Филм Фест”.
Ювилей Петра Кузмяка на ютре, 1. октобра, будзе означени у Основней и штреднєй школи з домом школярох „Петро Кузмяк” з пригодну програму и Округлим столом, з тему „200 роки од народзеня Петра Кузмяка”. Програма почина на 9,30 г., а Округли стол на 10 годзин.
Пейдзешат пияти Фестивал рускей култури „Червена ружа” на ютре и поютре, 1. и 2. октобра, перши раз будзе у рускокерестурскей Спортскей гали. Ютре почнє на 16 г. з отвераньом вистави подобових роботох авторки Андєлки Античевич з Беркасова, на 16,30 г. будзе музично-танєчна манифестация дзецох „Червене пупче“, а на 20 г. манифестация „Одгуки ровнїни“.
На нєдзелю, 2. октобра, на 17 г. будзе традицийне змаганє наших младих шпивачох за кошарку червених ружох и чобольов – „Червена ружа”, а на 20 г. Шветочни концерт „На штред широкей ровнїни”.
Перши Медзинародни мултижанрови фестивал руского филму „Русин Филм Фест” тиж тирва два днї, а на ютре, 1. октобра будзе отворени на 15. г. у Културно-образовним центре у Шидзе, кеди будзе ретроспектива 8 филмох о Русинох/Руснацох/Лемкох и приказованє єдного у цалосци.
На нєдзелю, 2. октобра, тиж на 15 г., у КПД „Дюра Киш” будзе Трибина з тему „Руснаци/Русини/Лемки у Першей шветовей войни”, после чого буду приказани 2 филми, а обидва днї будзе орґанизована и пригодна културно-уметнїцка програма.