ДЕВА (РУМУНИЯ) – У Деви, у Румуниї, того викенду – 19. и 20. юния, будзе отримани Тринасти Шветови конґрес Руснацох/Русинох/Лемкох (ШК РРЛ) и Седми Шветови форум русинскей младежи, на хторим участвую делеґати и госци зоз жемох-членїцох Конґресу и Форуму з Европи и Сиверней Америки.
Руску матку Сербиї на ШК РРЛ буду представяц 10 делеґати, Форум младих Рускей матки 5 делеґати на Шветовим форуме русинскей младежи, а з нашей жеми буду и двойо госци предсидателя Шветовей ради (ШР) РРЛ Дюру Папуґу.
Учашнїки на Конґресу з нашей жеми до Румуниї одходза на штварток, 18. юния дополадня, понеже исти дзень, на вечар, будзе отримана схадзка ШР РРЛ пред самим отримованьом Конґресу.
На пияток, 19. юния, на отвераню ШК будзе уручена и тогорочна Награда ШР з меном „Василь Турок Гетеш”, а попри у пленуме, Конґрес будзе робиц и у шейсц комисийох.
Шветови форум русинскей младежи у Деви будзе отримани на пияток, 19. юния пополадню.
На другим пленарним зашеданю, на соботу, 20. юния, ШК на дворочни мандат вибере и нових членох Шветовей ради РРЛ.
Под час Конґресу домашнї – Културне здруженє Русинох Румуниї – будзе орґанизовац пригодни културно-уметнїцки програми за учашнїкох Конґресу и Форуму, а на пияток вечар плановане отримац и Стретнуце русинских поетох и писательох, на хторим з нашей жеми буду участвовац Саня Тиркайло зоз Шиду и Себастиян Няради з Руского Керестура.