РУСКИ КЕРЕСТУР – Вчера, треци дзень отримованя 48. Драмского мемориялу Петра Ризнича Дядї, на сцени у Руским Керестуре госцовала мултиязична представа у продукциї Заводу за културу войводянских Руснацох „Свадзба” А. П. Чехова, а у режиї Лидиї Стеванович.
У представи ґлумя дзешецеро доберани, талантовани млади ґлумци з вецей войводянских местох, котри осучаснєни драмски текст по мотивох Чехововей „Свадзби” толкую углавним по сербски, алє местами и по словацки, нємецки, мадярски, гречески, руски и французки.
Медзи актерами и млади ґлумци з наших местох – Александра Лендєр з Вербасу, Андреа Бероня родом з Коцура, Иґор Горняк з Коцура и Себастиян Няради з Руского Керестура.
Керестурску публику яґда заинтриґовала тота нєзвичайносц представи, хтору попри добрих ґлумецких интерпретацийох краши и удатна сценоґрафия, костим и препознатлїва музика за тот простор, та од початку Мемориялу вчера було и найвецей патрачох на даєдней представи.
Награду за найлєпше одбавену улогу достала Александра Лендєр за толкованє „Мацери”.