РУСКИ КЕРЕСТУР – После чежкей хороти, пондзелок, 16. марца, у шпиталю у Сримскей Каменїци, у 64. року живота умар длугорочни музични редактор и совитнїк Радио Нового Саду Дюра Дудаш, котри бул и активиста у наших музичних фестивалох.
Народзени є 1. юния 1951. у Руским Керестуре‚ дзе закончел основну школу и нїзшу музичну школу. Штредню музичну школу закончел у Новим Садзе, дзе бул уключени до тедишнього КУД „Максим Горки”, дзе рок робел‚ грал на гармоники‚ а познєйше вецей роки бул активни у културно-просвитним живоце.
До Радио Нового Саду (РНС) за роботнїка у фонотеки пришол 1975. року‚ а познєйше постал музични совитнїк. Як залюбенїк до музики робел барз успишно як музични сотруднїк у РНС за шицки редакциї. За потреби Рускей редакциї виберал музику за радио-драми‚ гумористични емисиї, по потреби за рижни проєкти Телевизиї НС‚ документарни емисиї‚ як и музични, з хторих була позната емисия з тамбуровима оркестрами „У Новоме Саду”.
Провадзел забавну домашню, иножемну и народну музику и робел на популарних емисийох „Суботом са вама”‚ потим на габох дакедишнєй Радио Стотки” и Радио Скали.
Єден є з порушовачох акциї „Ружова заградка”, хтора познєйше преросла до Фестивалу, бул активни и у Фестивалє култури „Червена ружа”, насампредз у його фахових комисийох за оценьованє нових композицийох и шпивачох-аматерох.
До пензиї пошол 2005. року и з Нового Саду ше з фамелию врацел до родного Керестура, дзе нєшка на 14 годзин будзе поховани.