НОВИ САД – Престижна Лайден лїстина того року перши раз учишлєла Универзитет у Новим Садзе медзи 1 000 найлєпши у швеце, пише „Дневник”. Влонї на тей лїстини бул Универзитет у Беоґрадзе, а ранґованє и новосадского допринєсол же би Сербия була єдна з успишнєйших у реґионє, оценєл ректор Универзитету у Новим Садзе (УНС) проф. Др Душан Николич.
Того року на Лайден лїстини були лєм 842 универзитети, а УНС завжал 756. место.
– Основни критериюм за ранґиранє на Лайден лїстини то число роботох хтори индексовани у Web of Science, а же би универзитет могол буц у конкуренциї потребне мац найменєй 1 100 науково публикациї – потолковала проректорка УНС др Снежана Смедеревац.
Универзитети ше вреднує и на основи числа наукових публикацийох хтори у одредзеней обласци спадаю до єден одсто найцитиранших у швеце, а УНС ма три таки публикациї. Медзи 10 одсто найцитиранших роботох и 62 публикациї Универзитету у Новим Садзе, а медзи 50 одсто – 470 публикациї.
Значни критериюм и уключеносц универзитету до наукового сотруднїцтва, односно число роботох хтори обявени у коавторстве з авторами з других универзитетох, та других державох.
Окрем Лайден лїстини, найзначнєйши ранґ-лїстини и Шанґайска, Вебометрикс и У-Мултиранк.