РУСКИ КЕРЕСТУР – У просторийох Руского народного театру (РНТ) „Петро Ризнич Дядя” вчера уручени награди побиднїком на конкурсу за нови драмски тексти по руски, хтори вєдно розписали РНТ, Завод за културу войводянских Руснацох и НВУ „Руске слово”.
Пенєжни награди достали Сашо Палєнкаш за першонаградзени драмски текст „Белава принцеза”, Себастиян Няради за другонаградзени текст „Руснаци” и Любица Кнежевич, за трецонаградзени текст „Зочованя”. Награди им уручела директорка РНТ Ивана Дудаш.
На конкурс, хтори бул отворени од 1. октобра 2013. по 31. януар 2015. року, сцигли вєдно пейц драмски тексти под шифрами, и як таки их розпатрала окремна фахова комисия, хтора одлуку о наградох принєсла 24. мая.
Попри скромнейших пенєжних наградох, наградзени тексти буду обявени у часопису „Шветлосц”, а РНТ их, у доглядним чаше, постави на сцену.