РУСКИ КЕРЕСТУР – У просторийох Пакт рутеноруму у Младежским доме, всоботу 9. априла отримане ище єдно успишне преподаванє за младих на тему Християнство и пенєж, хторе виложел теолоґ Марко Радакович зоз Зомбора.
Вон пробовал розбиц предрозсуди о ище єдней християнскей теми, толкуюци правдиве одношенє ґу пенєжу и богатству т.є. маєтку, яке винєшене у кнїжкох Старого и Нового завиту.
Ґенерално, вони як таки нє осудзени, алє осудзене їх злохаснованє, лакомносц, и навязаносц на нїх, а поготов кед пенєж и материялни добра завежню место Бога цо поготов присутне у нєшкайшим трошительним дружтве.
И тото преподаванє було крашнє нащивене, а велї слухаче окреме похвалєли викладанє и уключели ше зоз своїма питанями и видзенями.
Преподаваня за младих на рижни християнски теми о хторих у нєшкайшим швеце єст погришни думаня, отримую ше раз мешачно, а шлїдуюце будзе у маю праве на тему найвекших циґаньствох, предрозсудох и правдох о християскей вири.
Вєдно их орґанизую парохийни Каритас св. оца Миколая, Рух фоколарох и Пакт рутенорум.
